Бојан Влаќевски за влакно до медал на Светското поединечно првенство во куглање 2018 во Клуж (Романија)

Нашиот кугларски „дијамант“ Бојан Влаќевски кој ги брани боите на к.к.Медвешчак - Загреб, ја доби шансата да настапи за Македонија на единственото место во дисциплината Single Classic кое WNBA NBC ѝ го додели на нашата држава, да се натпреварува на Светското поединечно првенство во Клуж, Романија за сениори, кое се одржа од 20.05-26.05.2018 година . 

Одлуката токму тој да биде во борба за најпрестижната титула била едногласна на целата делегација која допатува во Романија. Овој лимит на настап на наши играчи од WNBA NBC се засновува поради фактот што Македонија е отсутна цели 5 години од големите првенства (вината за оваа катастрофална состојба е исклучиво во Управата на КФМ, но тоа би било тема за некој друг пост).

За Бојан и не треба нешто посебно да се зборува, за неговото кугларско педигре, за неговата кристално чиста кугларска кариера и врвните резлтати кои ги постигнувал зад себе, како за клубовите за кои настапувал, така и за националниот дрес. Бојан е единствениот куглар роден во Македонија кој ја има надминато бројката од 700 соборени чуњеви, како вкупен резултат на еден натпревар итоа токму оваа година. 

„Резултатот од 701, кој го остварив во Хрватска, само беше мотивација плус да продолжам во тоа што го правам, а околу самодовербата беше, и најчесто била на високо ниво“ - изјави Влаќевски за блогот на к.к. Хераклеа.  

Стартот на СП беше повеќе од одличен, со одличното отворање во првиот настап Бојан собори вкупно 660 (254), што беше доволно во квалификациите да го освои 5-тото место за во продолжение на натпреварувањето да му овозможи да добие полесен противник т.е. 28-мо пласираниот  DIRNBERGER Mathias од Германија.

Како што е карактеристично за нас и нашиот менталитет, Бојан започна одлично и имаше водство во текот нa целиот натпревар, за на крај да го занемари фактот дека игра против Германец и дека отпорот нивен не завршува се до последната кугла, дојде до опуштање и својствено на тоа и грешки, што прилично му зададе проблеми околу одбраната на својата предност и со само една кегла и 2:2 во сетови (656), успеа да помине во наредната фаза т.е. во 1/8 финалето.

„Инаку нема натпреварувачи на СП за кои можеш да кажиш дека лесно ќе ги победиш. Тука нема време за калкулации и опуштања, каде што за малку поради моја грешка ќе загубев во 1/16 финалето“ - изјави Бојан.

Во 1/8 финалето кое се играше утрото на 25 мај, Бојан успеа да го надигра својот противник од Унгарија,  KOZMA Karoly и со убедливи 4:0 и огромна предност од 76 дрва (680), да влезе уште посамоуверено во наредната фаза.

Но, форматот на натпреварување кој го наметнува светската федерација е ужасно тежок. Во истиот ден се играше и 1/8 финале и 1/4 финале, итоа со временско растојание само од 150 минути, што бара исклучително, исклучително физичко-психолошка подготвеност.

„Не сум се сретнал досега со ваков формат на натпреварување, и е премногу тешко да се изджи тоа. Мора и физички и психички да си спремен за да стигнеш до некој повисок дострел. Од моја гледна точка јас бев само психички спремен. Нозете се грчеа при крајот, стануваа тешки да неможеш да го направиш она што го замислуваш“ - рече Бојан.

Во 1/4 финалето Бојан го доби за противник WEISS Manuel повторно куглар од Германија.

WEISS во квалификациите имаше послаб резултат од Бојан т.е. 639 и 13 место за разлика од 5-тото на Бојан. Во другите натпревари 666 и 633 во 1/8 финалето, што беа далеку послаби од Бојановите 680. Со победа над Германецот, Бојан ќе играше во 1/2 финале, што по автоматизам ќе значеше и загарантиран бронзен медал за Бојан и Р.Македонија (бидејќи не се игра мало финале според овој формат).

Почетокот во 1/4 финалето беше одличен. Бојан со одлични 172:166 успеа да се наметни во првиот сет и да ја придобие психолошката предност во овој дуел. Германецот изигра брилијантен втор сет и не само што го освои сетот туку и се стекна со разлика од 17 дрва. Бојан успеа да се врати повторно во игра добивајќи го третиот сет со 3 дрва и стекнувајќи водство од 2:1.

Во оваа ситуација, на Бојан му требаа или нерешен четврти сет, или предност од чун или повеќе за победа.

Одлично отвори во четвртиот сет и на 15 кугли во полни Бојан имаше предност од 4 дрва, земајќи ги во предвид и оние 2:1 во сетови, итоа како значителна предност.

Но, Германецот, среќно 16-та кугла т.е. првата кугла во чистење 9, на сметка на Бојан кој несреќно доби распар 7,  па уште еден распар за Бојан, па и трет што му даде огромна предност и крила на Германецот за да го добие четвртиот сет и воедно да се пласира во 1/2 финалето.

Линкови од официјалните документи за настапот на Бојан Влаќевски:

1.Квалификации http://www.wnba-nbc.de/2018-Single-Quali-Res-m.pdf

2.Втора фаза - финале http://www.wnba-nbc.de/2018-Single-m-Tabelle.pdf

3.Од целокупното првенство http://www.wnba-nbc.de/Sport/Weltmeisterschaften/WM-2018-Cluj/VII_-WM-Single/vii_-wm-single.html

Недостигаше спортска среќа за Бојан во овој дуел и еден убав удар на чистење го делеше од медал. Но тоа е, куглањето е таков динамичен спорт каде што решаваат толку ситни финеси што многу тешко се објаснуваат за оние кои не се добро запознаени со овој спорт.

Дефинитивно еден успешен настап, огромен успех за Бојан, за Македонија, за македонското куглање, за новите генерации на куглари, за спортот воопшто.  

Автор: Игор Михајловски

Read More

Кугларски спринт, за прв пат во Битола

Кугларскиот клуб Хераклеа иако „тенок“ со финансии и без значајни спонзори уште еднаш покажа и докажа дека не секогаш финансиите ја играат пресудната улога за добра организација на еден турнир. 

-Ентузијазмот и времето што нашите членови на клубот го вложија за да биде перфектна организацијата, ме прави посебно горд и ни дава дополнителен мотив да се избориме за остварување на нашиот сон - нова куглана во Битола“ - изјави Игор Михајловски, член на УО на к.к. Хераклеа.

Во саботата одлично беше организиран тромеч во Скопје види повеќе, а како добри домаќини во агендата беше вметната и прошетка низ винскиот регион на Р. Македонија и посета на една атрактивна винарија во Демир Капија - винаријата Попова Кула.

Вечерта големиот успех на к.к.Хераклеа и влезот во големото финале на Купот на Македонија беше пригодно одбележан во еден ресторан во Битола каде што гостите се забавуваа на македонската музика која дополнително придонесе за продлабочување на пријателството помеѓу двата клубови.

Утрото гостите имаа можност да се запознаат со убавата архитектура на прекрасната Битола, знаменитостите во градот, како и да се релаксираат со лежерно неделно кафе на Широк Сокак.

Турнирот во спринт 

Натпреварот започна во недела на пладне, и по вообичаените подароци кои се разменуваат на секој меѓународен натпревар, за прв пат во Битола се играше популарната дисциплина спринт која е атракција на големите европски и светски натпреварувања.

Во едно динамично темпо, каде се кугла 10 кугли во полни и 10 во чистење, на две патеки, а доколку е нерешен резултатот на стазите се исфрла по една кугла во полни, или доколку е 1:1 во поени по три кугли во полни, крајно неизвесно (слично на изведување на пенали во фудбалот), каде што победникот продолжува во наредната фаза, а поразениот отпаѓа, најпрво ги добивме првите 1/8 финалисти, па 1/4 финалисти, за веќе во 1/2 финалето да играат Пеце Димовски и нашиот најмлад куглар Никола Андоновски од нашиот клуб и Страхиња Драмичанин и Гојко Ескиќ од екипата на к.к. Цар Лазар - Крушевац. 

Во крајно неизвесни дуели кои будеа воздишки или еуфорија во публиката каде што одлучуваше само една кугла или само еден чун, најдобар и најсреќен беше Богдан Драмичанин кој е исклучително добар и изграден куглар, поранешен младински репрезентитев на Србија, во финалето за влакно беше подобар од нашиот Никола Андоновски, инаку јуниорски првак на Македонија за 2016 година. Никола не го послужи среќа во последната кугла и кога очекувавме пехарот да премини во рацете на Никола на кого му требаа 5 од 9 на пенал рулетот, чуњевите се разнишаа но не паднаа доволно и со само 4 паднати дрва, Никола мораше да се помири со второто место. 

Полуфинале на спринтот во Битола

Финалисти на спринтот

Денес во кугланата во Битола немаше место каде да се седне, а радува фактот што се повеќе млади доаѓаат на натпреварите кои ги има нашиот клуб. Позитивните искуства кои ги разменивме со нашите пријатели од Србија, се надеваме дека ќе ни помогнат во иднина во подобрување на сопствената игра, во тренажните процеси како и во креативноста и лукавоста на српските власти кои обезбедиле средства за реконструирање на кугларските објекти ширум Србија, што итоа како треба да биде искористено како позитивна пракса и кај нас.

Read More

Меѓународен тромеч во организација на к.к. Хераклеа

Меѓународната соработка со кугларските екипи од Крагујевац и Крушевац ја негуваме веќе неколку години. Благодарение на таа одлична соработка, во улога на организатори бевме домаќини на к.к. Цар Лазар од Крушевац, екипа која игра во Супер лигата во исклучително силната лига во Србија и екипата на ГТЦ од Скопје.
Терминот за овој тромеч лесно го договоривме, а ГТЦ како екипа од Скопје нашата покана ја прифати со задоволство.

Интересно беше што к.к. Хераклеа играше многу важен натпревар за влез во финале на КУП со екипата на Империјал Тобако на патеките од 1-4, а во истиот термин на патеките од 5-8 играа ГТЦ и Цар Лазар. Најдобрите 6 резултати на сите три екипи беа земени во предвид каде што победник е екипата која ќе има најмногу соборени дрва. Нас воопшто не ни беше лесно на овој пријателски натпревар бидејќи играчите ни беа во грч поради тензијата и важноста за влез во финалниот натпревар на Купот против екипата на Империјал Тобако.

На овој натпревар се постигнаа добри резултати каде што убедливо победник беше екипата на ГТЦ со 3311 вкупно соборени дрва. Второто место им припадна на гостите со 3190 дрва, кои за само 10 дрва беа подобри од нас. Ние бевме хендикепирани со тоа што игравме само со 6 играчи и немавме можност како другите два клубови да го исфрлиме најлошиот резултат. Во поглед на резултатите најдобри во своите екипи беа најмладиот куглар во Хераклеа - Никола Андоновски кој имаше 557, српскиот поранешен јуниорски првак Страхиња Драмичанин од к.к. Цар Лазар и легендата Тодор Манев од ГТЦ.

На крајот следуваше и пехар за најдобрата екипа, кој беше врачен од Игор Михајловски на капитенот на екипата на к.к. ГТЦ - Тодор Манев, кугларска легенда на Македонија.

Сепак, приоритет на овој пријателски натпревар не беа постигнатите резултати туку дружењето и продлабочувањето на комуникацијата со екипите од централна Србија и можноста за организирање на заеднички меѓународни натпреварувања кои ќе им помогнат посебно на младите куглари во подготовките за големите настапи на европска сцена.

По завршувањето на тромечот, следуваше традиционален ручек со гостите во една пријателска и опуштена атмосфера каде што се родија интересни идеи и предлози кои се надевам дека во иднина ќе можеме да ги реализираме заедно со нашите пријатели од Крушевац и Скопје.

Read More

Влез во финалето на Купот на к.к. Хераклеа

Сезоната 2017/18 беше полна со предизвици од кугларски аспект за нашиот клуб. И покрај финансиските проблеми, клубот од Битола реши да учествува во Купот на Македонија и да се натпреварува.
Како што е добро познато ги поминавме квалификациите на Купот и како 4-то пласирана екипа успеавме да влезиме во 1/2 финалето каде што со екипата на Империјал Тобако од Скопје го одигравме првиот меч и со убедливи 7:1 и 19.5 освоени сетови во Битола, остваривме недостижна предност за возвратниот натпревар.

Иако свесни за недостижната предност која ја остваривме во Битола, бевме внимателни и со доза на почит кон противникот умно ја изработивме нашата стратегија во поставувањето на играчите.

Клишето на размислување на тренерот на Империјал Тобако беше пробиено многу лесно и кога ја видовме нивната поставеност на играчите сфативме дека тој натпревар за нас ќе биде само рутина.

Очекувано домаќините на овој натпревар истрчаа со нивните два најдобри играчи во МКЛ. Младен како нивен топ играч на позиција 1 и Нунев кој кугла одлично. Во првиот блок, Михајловски беше принесената „жртва“ од Хераклеа кој одлично парираше на нивниот најдобар куглар и до последните кугли имаше можност и да го добие поенот, но Младен одигра зрело и не допушти изненадување. Колев пак, многу несреќно го загуби поенот иако имаше и водство после третиот сет од 2:1, и после играта во полни во четвртиот, па направи натрпеварот да влезе во неизвесност.

Во вториот блок куглаа капитенот Поповски и нашиот најдобар просек Димовски Пеце. И двата влегоа во натпреварот несигурно и го загубија првиот сет што реално им даде крила на домаќините и ги разгори нивните желби за убедлива победа на овој натпревар. Ќе повторам ние на овој натпревар игравме само за освојување на 1 поен и тоа беше нашиот фокус т.е. влез во финалето на Купот. Пеце со одлична игра се врати во натпрварот во вториот сет се стекна и со предност, за на крај Мандаровски на 116 кугла од полуолимписка успеа да ја уништи позиција и со либек и еден промашување да не влезе во нова постава што вроди со нервоза и неспортско однесување на истиот кое разбирливо не беше санкционирано од страна на судијата, кој после натпреварот ја призна својата грешка, но не влијаеше на самиот тек на натпреварот. Со овој поен веќе натпреварот за нас беше завршен и остатокот од натпреварот беше само формално исфрлување на кугли.

Третиот блок нашиот најмлад играч Никола Андоновски кој требаше да игра против Чипишков (Претседавачот на КФМ во оставка) кој видно разочаран од неуспехот на својот клуб го препушти своето место на еден од помладите куглари на Империјал, што беше лесен залак за нашиот талентиран јуниор и со предност од 2:0 во сетови само рутински го доведе поенот на контото на својот клуб. Со оглед на тоа што екипно имавме повеќе соборено чуњеви и освоени 2 поени од дуел играта, овој натпревар заврши нерешено т.е. 4:4.

Со оваа драгоцена победа во полуфиналето со 7:1 и 4:4, кугларскиот клуб Хераклеа од Битола успеа да се плаисира во финалето на Купот на Р.Македонија кој ќе се одигра на 28 април. Ова е еден огромен успех на битолскиот клуб кој по втор пат во својата историја влегува во финалето на Купот. Во финалето ќе треба да играме против големиот Макпетрол кој важи за апсолутен фаворит на овој меч.

Единствената шанса за успех на Битолчани на овој натпревар е факторот на изненадување и минимизирање на техничките грешки на кугларите од Хераклеа. Се игра само еден натпревар (на кугланата каде што тренира Макпетрол, што е дополнителен проблем за нас) но сепак можно е кугларско чудо. Потребна ќе ни биди дополнителна доза на кугларска храброст и агресивност во играта уште од првата кугла со фанатична борба за секој чун повеќе, за секоја подобра позиција за секоја кугла која ќе мора да биде „умно“ исфрлена. Само на овој начин умно со земање сет за сет имаме шанса да се надеваме за трофејот.

Нека ни е честито второто финале на Купот. Ако го освоиме Купот тогаш 100% излегуваме на меѓународниот NBC турнир, ако загубиме и сме втори, со оглед на ставот на Макпетрол да излезе токму на овој респектабилен куп, ќе мора да бидат задовоени уште два услови на (Вардар и ГТЦ), но има време за калкулации. Не очекува овој битен финален меч и веруваме дека можиме да приредиме изненадување.

Read More

Кугларите од Битола на чекор до Финалето на Купот

Денешниот натпревар беше еден од потешките натпревари поради негативниот набој кој го имаме на релација Хераклеа - Чипишков (инаку Алфа и Омега во к.к.Империјал Тобако, а воедно и Претседавач со Кугларската Федерација на Македонија).

Имено, како што е веќе познато, горенаведеното лице оваа сезона со неправедно донесени одлуки, самоиницијативно, успеа да наштети на битолскиот кугларски клуб и да скрати 6 поени на Хераклеа, кои ќе не донесеа сигурно на третата позиција во МКЛ.

Во ист стил, дрско и безобразно, без било каква најава или допис, самоиницијативно како гостин донесе двајца искусни судии од Скопје на денешниот натпревар без да биде запознаен нашиот клуб. Затекнати во една таква ситуација, немајќи каде да се пожалиме бидејќи Гоце ја има монополизирано КФМ, ги стави искусните судии Љупчо и Диме во небрана ситуација, кои креваа раменици и не знаеа што да кажат во одбрана на нашите забелешки.


Така и започнавме, а Гоце скоро и да не седеше во кугланата. Нашите играчи беа подготвени да не реагираат на можни реакции и таа психолошка подготовка се одрази веднаш на мечот.

На позиција бр.1 беше Пеце Димовски, куглар со најдобар просек во МКЛ од Битола, а на позиција 2, капитенот Цане Поповски. Двата во полна концентрација искуглаа брилијантно не допуштајќи на противниците да земат воздух наметнувајќи жестоко темпо уште со првата кугла. Огромната предност која ја направија овие двајца куглари беше многу значајна за понатамошниот дел од натпреварот. Вкупно во сетови беше 7:1 во овој дел.

Во вториот круг, на позиција 3 и 4 играа Цане Колев и Игор Михајловски.
Противникот беше надмудрен во поставеноста на нашите играчи и токму Младен Донковски, ударната игла на Империјал налета на секогаш одличниот Колев кој го елиминира со 4:0.
Михајловски пак, имаше трет сет од бајките, и со невидени за Битола 78 во чистење или 169 на таа патека успеа да ја достигне вкупната цифра од 557 што не само што беше најдобар резултат на натпреварот, туку е и резултат кој ретко се гледа во Битола, а воедно овој резултат е втор по јачина од кога постои битолската куглана. Двата поени беа добиени и најубедливи 8:0 во сетови.

Третиот блок, Љупчо Спирковски проба да кугла, повеќе ревијално, но успеа да земе само 0.5 сет од 2, а на негово место влезе Менде Андоновски кој во последните кугли не успеа да го добие сетот и го изгуби поенот. Никола Андоновски, јуниорскиот првак, играше и рутински го доведе мечот во своја полза. Нерешено во поени 1:1, но голема предност во сетови, 4.5: 3.5

Овој натпревар беше и емотивен за нас и токму на најдобар можен начин му покажавме на Гоце Чипишков колку не е во право и го декласиравме на кугларските патеки и лично него со 100 чуњеви разлика и неговата екипа со скоро 300 дрва разлика што можеби е една од најубедливите победи на Битолчани иако се работеше за 1/2 Финале на Купот на Македонија во куглање.

Што значи ова за Битолчани? Значи дека на возвратниот натпревар кој ќе се одигра во Скопје наредната сабота, на кугланата каде што кугла Империјал Тобако, нас ни се потребни барем 1 поен и барем 5 сетови. Во тој случај к.к. Хераклеа ќе биде подобра од Империјал Тобако и ќе го чека подобриот од другото 1/2 финале каде што играат екипите на Макпетрол и ГТЦ. Тој натпревар заврши со убедлива предност на Макпетрол од 6:2, што скоро е извесно кој ќе биде во финалето и од нашиот дуел и од другиот дуел.

Не сакаме да брзаме со изјави за постигнат успех, но учеството во финалето со Макпетрол и можноста преку еден натпревар да се одрени победникот на Купот за нас ќе значи многу и веќе се разгоруваат желбите кај нас конечно да го крениме тој трофеј и да го одбележиме најголемиот успех на оваа кугларска генерација.

Read More

Кугларите од Битола го победија гигантот „Макептрол“

Кугларскиот клуб „Хераклеа“ од Битола денес во кугланата во спортската сала „Младост“ - Битола приреди вистинско изненадување и успеа да го совлада елитниот кугларски клуб „Макпетрол“ убедливо со високи 6:2 и разлика во чуњеви од 63 во своја полза, добивајќи го противничкиот клуб и на сетови со 14:10.

Впрочем, да се кугла против Макпетрол не е воопшто лесно со оглед на квалитетот на нивните играчи и нивниот професионален однос кон секој натпревар. Се работи за најбогатиот клуб во историјата на македонското куглање, клуб кој ги собира најквалитетните куглари од сите екипи, кои се добро платени и кои имаат меѓународни амбиции борејќи се за престижните европски титули. Клубот ги поседува скоро сите репрезентативци во сениорска конкуренција и веќе 15 години последователно е непобедлив, а шампионската титула ја освојува секоја година деценија и пол наназад.

Така беше и оваа сабота, екипата допатува во Битола во полн состав (беа присутни повеќе од 12 куглари) со најдобрите нивни играчи, целејќи на полн плен т.е. 2 поени и убедлива победа.

Но спортот не би бил интересен ако натпреварите се добиваат по звучноста на имињата во составите. 

 

Противникот влезе релаксирано со нивниот најдобар поединец битолчанецот Александар Соколовски, репрезентативец во сениорска категорија на Македонија, кој излезе од к.к. Пеистер, но веќе деценија кугла за македонскиот шампион. Соколовски е врвен играч, еден од ТОП 50 во Европа, вистински професионалец кој требаше да го донесе нивниот сигурен поен, а Дане Јакимовски (куглар со снажен удар) да ја зголеми предноста и да стартуваат со 2:0 што би значело и еден пријатен тек за гостите.

Ние влеговме во овој натпревар исклучиво да се надигруваме и да пробаме да парираме со надеж за евентуална победа која би била тесна на крајот знаејќи дека во нашите редови го немавме Пеце Димовски, нашиот убедливо најдобар куглар кој е оправдано отсутен и не може да ги игра сите натпревари.

Михајловски на позиција број 1 изигра добар прв сет (133), но брилијантниот Соколовски со свои 155 поажа дека нема милост кон својот матичен клуб. Но веќе во вториот сет, работите се сменаа во вториот дел, кога Михајловски брилинатно започна да чисти и со скоро неверојатни 68 (влез во 8 постава) не само што ја врати разликата над Соколовски туку со квалитетна игра покажа дека Соколовски ќе треба да се препоти за евентуалниот поен. Третиот сет беше во полза на Соколовски, а во четвртиот сет Михајловски го издржа притисокот и ја зачува предноста и со +4 успеа да го добие поенот 2:2 во сетови, со што беше и најдобар на мечот со 524 соборени дрва. 

Поповски пак имаше полесна задача, куглаше против Јакимовски кој не успеа баш најдобро да се снајде на битолската куглана и изваде скромни 474. Капитенот Поповски тоа итоа како го искористи трупаше значителна разлика од + 37 дрва, и убедливо со 3:1 го скрши отпорот. После првиот блок јасно беше дека Макпетрол со 0:2 и со -41 дрво, ќе мора да игра без грешка за посакуваната победа, а ветерот во грб од предноста итоа како беше корисна за нашите двајца куглари во вториот блок Колев и Ристевски.

Колев е една битолска легенда кој требаше лесно да го совлада Беличански, а Ристевски требаше да неутрализира репрезентативенот Трпчевски.

И двата наши играчи заводеа со 2:0 што донесе дилириум во публиката, а Макпетрол беше скоро нокаутиран. Четвртиот сет Колев водеше со +10 до пред чистењето и требаше само рутински да го донесе натпреварот до крај, но очајно исчисти (26, без влез во 4 постава), противникот зеде крила од таа негова игра и буквално со последната кугла успеа за влакно да го добие. Ристевски покажа карактер и ја оствари можеби пресудната победа за овој меч, го совлада репрезентативецот Трпковски со 3:1.

Со предност од 3:1 и +50 дрва во третиот блок требаше само да се зачува оваа предност или евентуално да се земе уште еден поен за наша победа. Притисикот кај Макпетрол беше очигледен, и како што вообичаено бива, веќе нивните дланки не беа мирни и се вовлекуваа во нови грешки знаејќи дека немаат простор за грешка. 

Таму нашиот Андоновски (државен јуниорски првак за 2016) изигра брилијантно и со 520 го уништи противникот. Неговото зголемување на разликата само стави точка на овој денешен спортски подвиг на нашиот колектив. Спировски изигра во рамки на очекуваното но не дозволи репрезентативецот Николовски да ја стопи стекнатата разлика. 

Сумирано, во секој сегмент бевме подобри од Макпетрол, тактички добро и избалансирано поставени, изигравме квалитетен натпревар со екипен резултат од одлични 3028 што е навистина цифра за битолската куглана и што е најбитно бевме убедливи во меѓусебните дуели недозволувајќи афторитетот да биде пречка во надигрувањето, туку таа фаворитска улога на гостите ја искористивме за дополнителен мотив и концентрација, надмудрување и покажување на кугларската техника.

Останува старата болка, кугланата во Битола. Таа е стара (1981) и не ги задоволува стандардите на Светската кугларска федерација и веќе од 2019 година КФМ нема да ја дозволува за одигрување на првенствени натпревари. Ако не се превземат итни мерки и инсталирање на потребната подлога и автоматика, се заканува згласнување на овој спорт кој има богата традиција во конзулскиот град.

Read More